Settimana della cultura friulana: un bilancio

Al è timp di belanç pe Setemane de Culture Furlane 2022, la rassegne promovude de
Societât Filologjiche Furlane che si è davuelte dai 5 ai 15 di Mai. Une edizion “de
rinassite” che cui 192 events in program e je tornade pe plui part sul teritori e cul public
in presince, ma e à mantignût ancje la forme di comunicazion in rêt, che si veve
sperimentât in timp di pandemie. A pôcs dîs de conclusion, i passe 40 events in linie si
si puedin tornâ a viodi in maniere libare sul sît internet www.setemane.it: de
conference stampe di presentazion al conciert sul Nûfcent furlan, dal ricuart di Elio
Bartolini a chel di Giuseppe Francescato, dai filmâts di presentazion des rivistis furlanis
a chei che a mostrin cualchidune des dimoris storichis di chenti e la preparazion di
ricetis gjavadis dai cuaders di famee.
Un sucès pandût dai numars racuelts des plateformis informatichis, che a àn regjistrât
17.000 visualizazions, un dât che al cressarà di sigûr propit stant che di cumò ducj i
events si puedin tornâ a viodi su la rêt.
«Il grant lavôr che o vin fat in chescj mês, cu la partecipazion di cetancj studiôs,
apassionâts e istituzions, al è stât premiât cuntun sucès che dal sigûr al supere ce che
si spietavisi – al dîs il President de Societât Federico Vicario – un sucès che al fâs de
nestre Setemane de culture furlane la rassegne regjonâl di riferiment sui temis de
culture, des tradizions, de lenghe e de identitât dal nestri Friûl. L’impegn di ducj noaltris,
cumò, al è chel di puartâ indevant la manifestazion rivant a meti adun, cun events in
presince e digjitâi, gnovis edizions inmò plui sioris di events e di emozions».
La Setemane, che e à vût il patrocini dal Ministeri de Culture, de Regjon Autonome Friûl
Vignesie Julie, dal Consei Regjonâl e di 58 Comuns furlans e che e je sostignude de
Fondazion Friuli, e je rivade a vê chest grant risultât a nivel globâl ancje in gracie de
partecipazion dal Ent Friuli nel Mondo, une colaborazion che e à permetût di slargjâ la
rassegne rivant ai diviers “Fogolârs furlans”. A àn cun di plui colaborât passe 170
associazions dal teritori: grops culturâi, teatrâi e corâi, istitûts comprensîfs, bibliotechis,
parochiis, pro loco.
La Setemane e je stade la ocasion ancje chest an par ricuardâ cetancj personaçs de
furlanetât che di lôr tal 2022 si ricuarde un aniversari particolâr: tra chescj, naturlamentri,
il centenari de nassite di Pieri Pauli Pasolini (e va indevant fint ai 12 di Jugn in Palaç
Mantica in vie Manin a Udin la mostre “Pasolini 100. Mario Micossi sui luoghi delle
Poesie a Casarsa”) e di Elio Bartolini, ma a son stâts ricuardâts ancje Ermes di
Colorêt a Colorêt, Riedo Puppo a Murùs, Giulio Andrea Pirona a Dignan, pre
Gilberto Pressacco a Cividât, Renzo Valente a Udin, Vincenzo Manzini dai students
di San Denêl, Marco Davanzo a Dimpeç, il mestri Luigi Garzoni a Cjassà, inte suaze
de Fraie de Vierte ch’e à sierât la rassegne cun ancje la presentazion dal numar speciâl
de riviste «Sot la Nape» dedicade al teritori. Jenfri lis cunvignis o ricuardìn i chê sui
fonts musicâi in Friûl a Udine e su lis scuelis di confin a Tarvis e, tra lis novitâts
editoriâls, la presentazion dal volum “Mama moja, cent ricetis plui une” di Lucia Pertoldi,
e de gnove edizion di “Par un pêl” di Riedo Puppo.
Une “rinassite” ancje pai fruts: chest àn si à podût tornâ a meti dongje un calendari di
leturis e ativitâts in lenghe furlane pai plui piçui, in colaborazion cun cetantis bibliotechis
di Udin ae Basse, a Cordovât, Sopula, Glemone, Nimis, Cjassà, Pavie.